Joomla TemplatesBest Web HostingBest Joomla Hosting

ዋና ገፅ ፕሮግራም የስርዓተ ፆታ አካል ጉዳተኝነትና ባህል ዩኒት

የስር-ፆታ፣ አካል ጉዳተኝነት እና ባህል ክፍል

በኢትዮጵየስርዓተ-ጾታ እኩልነት አለመስፈን ስር የሰደደ ማህበራዊ ችግር ሆኖ ቆይቷል፡፡  በተለይም በአማራ ክልል ያሉ ልጃገረዶች እና ሴቶች ግንባርቀደም ተጠቂ ናቸው፡፡ ጉዳዩ የሴቶች ህይዎት ላይ ብቻ ጫና የሚያሳድር ቢመስልም በአጠቃላይ በማህበረሰቡ ላይ የሚያመጣው ኢኮኖሚያዊ፣ ማህበራዊ እና ፖለቲካዊ ጉዳት ከፍተኛ ነው፡፡

የስርዓተ-ፆታ እኩልነት ችግር እና ምቹ ያልሆኑ የስራ አካባቢዎች ሴቶችን እና የአካል ጉዳተኞችን ለባሰ ድህነት ያጋልጧቸዋል፡፡ ይህ ደግሞ የሚነመጨው ሴቶች በትምህርት ተደራሽ ባለመሆናቸው  እና ሃብት ማፍራት ባለመቻላቸው ነው፡፡ ምንም እንኳ ሴቶች በቤት ውስጥ ስራ የአንበሳውን ድርሻ ቢወስዱም ተገቢውን እውቅና አላገኙም፡፡  በማህበረሰቡ ዘንድ የኢኮኖሚ ጥገኛ ተደርገው ስለተቀረፁ እኩል ንብረታቸውን የማስተዳደር እና በሃብታቸው እኩል ውሳኔ  የመወሰን አቅማቸው ዝቅተኛ  ነው፡፡

በዚህ ዘርፍ በአማራ ክልል ያለዕድሜ ጋብቻ ከፍተኛ ማህበራዊ ቀውስን እያስከተለ ይገኛል፡፡ በዚህም ልጃገረዶች ከትምህርት ገበታቸው እንዲያቋርጡ ከማድረጉም ባሻገር ለፊስቱላ ተጋላጭ አድርጓቸዋል፡፡

አመልድ የክልሉ የልማት አጋር በመሆኑ የስርዓተ-ፃታ እኩልነት እንዲሰፍን እና ሴቶችን በማበረታታት፣ የአካል ጉዳተኞችን በመደገፍ እና ኤች.አይ.ቪ ኤድስን በመከላከል ዘርፍ ጉልህ ሚና ይጫወታል፡፡  ሴቶችን እና የአካል ጉዳተኞችን ያላካተተ የድህነት ቅነሳ ግብም ሊሳካ አይችልም፡፡ በመሆኑም በድርጅቱ ፕሮግራሞችና ፕሮጀክቶች ውስጥ አካታች የልማት ፕሮግራሞች በማካተት ለውጥ ለማምጣት እየሰራ ይገኛል፡፡

በመሆኑም አመልድ እነዚህን እውነታዎች ግምት ውስጥ በማስገባት በድርጅቱ መዋቅር ውስጥ የስርዓተ-ጾታ፣ አካል ጉዳተኝነት እና ባህል ክፍልን በማቋቋም በ3 ጉዳች ማለትም ስርዓተ-ፆታን በፕሮጀክቶች ውስጥ አጣምሮ መተግበር፣ የአካል ጉዳተኞች አካታችነት እና  ኤች.አይ.ቪ ኤድስን የመከላከል ስራዎችን በአራት ዋና ዋና ፕሮግራሞች በማካተት እየሰራ ይገኛል፡፡ በተለይም የስርዓተ-ጾታ እኩልነት እና ሴቶችን የማብቃት ስራ በቢሮ ደረጃ እየተሰራ ነው፡፡ በፕሮጀክቶች ደግሞ የስርዓተ-ጾታ እና የአካል ጉዳተኝነት አካታችነት ስራዎች በትኩረት እየተተገበሩ ይገኛሉ፡፡ በዚህ ዙሪያ የማህበረሰቡን አመለካከት ለመቀየር ከአጋር ድርጅቶች ጋር ሰፊ ስራዎች ተሰርተዋል፡፡

በአጠቃላይ አመልድ ከ1.1 ሚሊዮን በላይ ተጠቃሚ ሴቶች፣ ወንዶች እና ልጃገረዶችን በመንደር ተኮር ኢኮኖሚያዊና ማሕበራዊ ቁጠባ ቡድኖች በማሳተፍ እና መሰረታዊ የአስተሳሰብ ለውጥ እንዲያመጡ በውይይት፣ ድራማ በማዘጋጀት፣ የተለያዩ ጽሁፎችን በማዘጋጀት፣ በመገናኛ ብዙሃን መልዕክቶችን በማስተላለፍ፣ ስልጠና በመስጠት እና በት/ቤት ክለቦችን በማቋቋም የተለያዩ ስራዎችን ያከናውናል፡፡