"ከምንጠጣው ኩሬ ውስጥ በተገኘው ነገር ተደናግጠን ሩቅ ወንዝ እየሄድን እንቀዳ ነበር"- አርሶ አደር አለልኝ ጌታሁን

በአመልድ የተቀናጀ የማህበረሰብ ልማት ፕሮጀክት ከግሊመር ኦፍ ሆፕ ግብረ-ሰናይ ድርጅት በተገኘ 83 ሚሊዮን ብር ድጋፍ በሊቦከምከም ወረዳ 9 ቀበሌዎች እ.ኤ.አ ከ2018 ጀምሮ በንፁህ መጠጥ ውሃ አቅርቦት፣ በሬ በማድለብ፣በግ በማርባት እና ማድለብ፣ ፍየል እና ዶሮ በማርባት እና ሽንኩርት በማልማት 1 ሺህ 79 አርሶ አደሮች በፕሮጀክቱ ታቅፈው ኑሯቸውን ለማሻሻል እየሰሩ ነው፡፡

በፕሮጀክቱ የንፁህ መጠጥ ውሃ ተጠቃሚ ከሆኑት መካከል የአንጎት ቀበሌ ነዋሪው አርሶ አደር አለልኝ ጌታሁን አንዱ ናቸው፡፡ አርሶ አደር አለልኝ የ38 ዓመት ጎልማሳ እና የሦስት ልጆች (ሴ፡1) አባት ናቸው፡፡ ኑሯቸውን በግብርና ስራ እየመሩ የሞቀ ቤተሰብ መስርተዋል፡፡ ነገር ግን በአካባቢያቸው ንፁህ የመጠጥ ውሃ እጥረት ጋር በተያያዘ በሚያጋጥሙ የጤና ችግሮች ምክንያት የቤተሰባቸው ሰላም የሚናጋበት ወቅት ነበር፡፡

በአመልድ የተቀናጀ የማህበረሰብ ልማት ፕሮጀክት የንፁህ መጠጥ ውሃ ግንባታ ከማግኘታቸው በፊት በአንድ ወቅት የእርሳቸውን ቤተሰብ ጨምሮ ለአካባቢው ህዝብ ያስጨነቀ ጉዳይ አጋጥሟቸው ነበር፡፡ በአካባቢው አንድ ውሻ ከታመመ በኋላ አድራሻው ይጠፋል፡፡ ባለቤቶቹም በውሻቸው መጥፋት ተስፋ ቆርጠው በተቀመጡበት ጊዜ አንድ መጥፎ ዜና ለመንደሯ ነዋዎች ደረሳቸው፡፡ ያም ከሚጠጡት ምንጭ አናት ላይ ካለ ኩሬ የሞተ ውሻ ሽታ እንዳለ የሚያሳይ መረጃ ነበር፡፡ በወቅቱም የተሰማቸውን ስሜት አርሶ አደር አለልኝ ሲያስታውሱ "ባለቤቴ ውሃ ምትቀዳው አጫ ከሚባል ኩሬ ነበር፡፡ አንድ ጊዜ ከኩሬው ውሻ ገብቶ ሳናየው ሰጥሞ ሙቶ ተገኘ፡፡ የሞተውን ውሻ ከኩሬው ያወጣሁት እኔ ነበርሁ፡፡ በአካባቢው ከዚህ ኩሬ 16 አባውራዎች ተጠቃሚ ነበሩ፡፡ ሁላችንም ባገኘነው ነገር ተደናግጠን ከሩቅ ወንዝ ለአንድ ሰዓት እየሄድን ውሃ እንቀዳ ነበር፡፡ በኋላ ውሻው በእብድ ውሻ በሽታ ነው የሞተ ተብሎ ሁሉም ተጠቃሚ ባህላዊ መድሃኒት ፍለጋ ደ/ታቦር ከተማ እየሄድን ስንታከም ነበር፡፡ እኔ በግሌ ከ 1ሺህ 600 ብር በላይ ወጪ አውጥቻለሁ፡፡ የነበረብን ማህበራዊ ጭንቀት ቀላል አልነበረም" ብሏል፡፡

አሁን በአመልድ የተቀናጀ የማህበረሰብ ልማት ፕሮጀክት የንፁህ መጠጥ ውሃ ተገንብቶላቸው ደስታቸው የላቀ ሁኗል፡፡ "አሁን ንፅህናው የተጠበቀ ጣፋጭ ውሃ በቀላሉ አግኝተናል፡፡ የባለቤቴ እና የልጆቼ ድካም ተቀርፏል፡፡ እኛም ደስ በሎን ውሃ እየጠጣን ነው፡፡ አመልድ እና የግሊመር ኦፍ ሆፕ ድርጅት የህዝብን ህይዎት እየታደጉ ነው" ብሏል፡፡

ፕሮጀክቱ በወረዳው 17 ሺህ 176 ነዋሪዎችን (ሴ፡ 8,457) ተጠቃሚ ያደረጉ 50 የውሃ ተቋማት ማለትም 26 ጥልቅ ውሃ ጉድጓዶች፣17 የእጅ ውሃ ጉድጓድ እና 7 የምንጭ ማጎልበት ግንባታዎች ተሰርተዋል፡፡

የውሃ ተቋሙ ሳይበላሽ ለብዙ ዓመታት አገልግሎት እንዲሰጥ የተጠቃሚዎች ኮሚቴ ክትትል ያደርጋል፣ዘበኛ መድቦ ያስጠብቃል፡፡ የውሃ ግንባታው ቢበላሽ ለማስጠገን እያንዳንዱ ተጠቃሚ በወር አምስት ብር እየቆጠ ይገኛል፡፡ ውሃውን የሚንከባከቡ፣ ቢበላሽ የሚጠግኑ ራሳቸው የንፁህ መጠጥ ውሃ ተጠቃሚዎች ናቸው፡፡