"እንኳን ለ2014 ዓ.ም አደረሳችሁ፤ በአዲስ ዓመት አዲስ ህልምና ብሩህ ተስፋን እንሰንቅ!" ዓለማየሁ ዋሴ እሸቴ (ዶ/ር) የአመልድ ኢትዮጵያ ዋና ዳይሬክተር

ለመላው የአገራችን ህዝብና በውጭ አለም የምትኖሩ ወገኖቻችን እንኳን ለ2014 አዲስ ዓመት በሰላም አደረሳችሁ!

አዲስ ዓመት በመጣ ቁጥር አዲስ ህልምና ብሩህ ተስፋን እንሰንቃለን። አዲስ ዕቅድና ተስፋን የምንሰንቀው በተለምዶ የሚደረግ ስለሆነም አይደለም። አዲስ ዓመት የአዲስ ዕይታ ምንጭ ነው፤ በነበረውና በሚሆነው መካከል ትስስር የሚፈጥርልን ድልድይ ስለሆነ ጭምር እንጅ።

ከዚህ አኳያ ግጭትና አለመግባባትን አስወግደን በመደማመጥ ችግሮቻችንን የምንቀርፍበት፣ የሰላምና የልማት ስራዎቻችንን የምናሳልጥበት እና የኢትዮጵያዊነት ጠንካራ አንድነት ዳግም እንዲመለስ የምንሰራበት ዘመን በመሆኑ ሁሉም ወገን የድርሻውን ርብርብ እንዲያደርግ ጥሪየን አቀርባለሁ።

በአገር ውስጥና በውጭ ለምትኖሩ ኢትዮጵያዊያንና ኢትዮጵያዊያት፣ ትውልደ ኢትዮጵያዊያን እና ለኢትዮጵያ ወዳጆች ሁሉ አዲሱ ዓመት የሰላም፣ የጤና፣ የፍቅርና የአንድነት ዘመን እንዲሆንላችሁ ከልብ እመኛለሁ።

በዚሁ አጋጣሚ ስለአመልድ ኢትዮጵያ ስራዎች በጥቂቱ ላስተዋውቃችሁ እወዳለሁ፡፡

አመልድ ኢትዮጵያ በ1976 ዓ.ም የተመሰረተ የበጎ አድራጎት ድርጅት ሲሆን በዋናነት የሰብዓዊና የልማት ፕሮጀክቶችን ይፈጽማል፡፡ ድርጅቱ ስትራቴጅያዊ ጠቀሜታ ያላቸው የአጭርና የረጅም ጊዜ ፕሮግራሞችንና ፕሮጀክቶችን በመቅረጽ የህዝቡንና የመንግስትን የልማት ክፍተቶች በመሙላት ጉልህ አስተዋጽኦ በማበርከት ላይ ነው፡፡

ይህ ድርጅት በአሁኑ ጊዜ በ5 ዋና ዋና የልማት ፕሮግራሞች አማካኝነት ከ1.6 ቢሊዮን ብር በላይ የምግብ እህል እርዳታን ጨምሮ 33 ፕሮጀክቶችን በመተግበር ከ1 ሚሊዮን በላይ በድህነት የሚኖሩ ወገኖችን ህይወት ለማሻሻል እየሰራ ይገኛል፡፡

በ2014 ዓ.ም ትኩረት ከሚሹ ስራዎቻችን መካከል፡-

• ለገቢ ማስገኛነት የተቋቋመው የባሕር ዳር አውቶሞቲቭ ኢንጂነሪንግ/ጋራዥ በሙሉ አቅሙ ወደ ስራ በማስገባት ለክልሉ ተመራጭ የተሽከርካሪ ሰርቪስ አገልግሎት እንዲሰጥ የምናስችልበት፤ የዓባይ ኮንስትራክሽንን ይበልጥ ፍሬያማ የምናደርግበት

• የባሕር ዳር እጽዋት ቲሹ ካልቸር ማዕከል በሙሉ አቅሙ ከበሽታ የጸዳ ችግኝ ዘር ለክልሉ አርሶ አደር እንዲያቀርብና ምርታማነት እንዲጨምር የምንደግፍበት ወዲያውም ገቢውን የምናሳድግበት፣

• በአዲስ አበባ ከተማ ያስገነባነውን ባለሶስት ታወር (4G + B+ 5, 4G + B+ 15, 4G + B+ 25) ዘመናዊ ህንጻ ለምረቃ በማብቃት ወደ ስራ የምናስገባበት፣

• የአዲስ አበባ ቅርንጫፍ ጽ/ቤትን በሚገባ አደራጅተን ቀልጣፋ አገልግሎት የምንሰጥበት፣

• የሃብት ማስገኛ ተቋማትን በማጠናቀቅ በውጭ እርዳታ ላይ የተመሰረተውን የልማት ስራ በዘላቂነት ለመደገፍ በቁርጠኝነት የምንሰራበት እንዲሁም

• የተቀናጁ የልማት ፕሮጀክቶችን ለማከናወን የሚረዱ ፕሮፖዛሎችን በመቅረጽ የተሻለ ሃብት የምናፈላልግበት ነው፡፡

በአጠቃላይ በአገራችን የደረሰውን ማኅበራዊ መፈናቀልና የኑሮ መዛባት የምናስተካክልበት፤ በድህነት የሚኖሩ ወገኖችን ህይወት የምናሻሽልበት በዋናነት የተሻሻሉ የግብርና ቴክኖሎጂዎችን ለአርሶ አደሩ የምናስዋውቅበት፣ የንጹህ መጠጥ ውሃና አነስተኛ መስኖ የምንገነባበት፣ የደን ልማት ስራችንን የምናጠናክርበት፣ የስርዓተ ምግብና የስነ-ንጽህና እንዲሻሻል የምንሰራበት፣ ለወጣቶች የተሻለ የስራ ዕድል እንዲፈጠር የምንተጋበት እንዲሁም ሴቶች፣ ህፃናት እና የአካል ጉዳተኞች በፕሮጀክቶቻችን ውስጥ ተጠቃሚ ለማድረግ የምንተጋበት ጊዜ ነው፡፡

በድጋሚ መልካም ዘመን!

እንቁጣጣሽ

ዓለማየሁ ዋሴ እሸቴ (ዶ/ር)